coliseum

COLISEUM

, seu

Colosseum

 : sic Amphitheatrum Titi Romæ vocant, de quo id Bedæ Vaticinium exstat in Excerptis seu Collectaneis ejusdem Bedæ : Quandiu stabit Colyseus, stabit et Roma ; quando cadet Colyseus, cadet et Roma ; quando cadet Roma, cadet et mundus. Anastasius in Stephano II. PP. pag. 93 : Dum ad Colisseum advenissent, etc. Ugutio : Coloseum, quidam locus Romæ ; ubi olim erant imagines omnium provinciarum, et in medio erat imago Romæ tenentis pomum aureum, utpote domina et regina omnium, et erant i.... dispositæ arte nigromantiæ, quia quando aliqua Provincia volebat insurgere contra Romanos, statim imago Romæ obvertebat dorsum imaginis illius provinciæ : vel ubi Dominus, imago illius provinciæ insurgebat contra Romæ imaginem, et tum Romani ex improviso mittebant illuc exercitum, et provinciam illam subjugabant. Tali arte Romani Trojani mundum subjugabant. Risum tenete. Vocis origo non aliunde ducenda, quam a colossea seu immani amphitheatri ipsius excelsitate, ut docte probat Alexius Symmachus Mazochius in Commentario in mutilum Campani Amphitheatri titulum pag. 133. et 134. An simili notione sumitur in Chron. Episcopor. Verdensium apud Lebnit. tom. 2. Scriptor. Brunsvic. pag. 212 : Angustiata inter Coliseum et Ecclesiam S. Clementis peperit, et postea mortua ibidem, ut dicitur, est sepulta.